بقالى تلات ايام اهو بتفرج على التلفزيون و حاسس إن الكلام بيتكرر “يلا نبنى مصر” و “البلد مش محتاجة شعارات” .. نفسى مرة يكملوا الجملة عشان أعرف نبنى مصر لمين؟ و ننسى الشعارات ليه؟
بالعند فيكم.. لأ مصر محتاجة لشعارات كتير و على سبيل المثال و ليس الحصر “لا للتحرش” , “لا للمحاكمات العسكرية”, “عيش, حرية, عدالة إجتماعية” و المساواه إلى آخره … مصر مش محتاجة الشعارات دى؟ ولا هى محتاجة نبنى و خلاص و اللى يطلع يطلع؟ هنبنى على إيه و البلد فيها مشاكل مالهاش أول من آخر؟ ولا هو لازم نبنى و ننضف الشوارع و ننسى اللى ماسكين البلد عشان يشوفوا حالهم مع نفسهم؟ ننضف الشوارع و ندفع فواتير النظافة و إحنا ساكتين عشان نبقى شعب متحضر و حلو و جميل و نعجب, مش كدة؟
نبنى مصر عشان رجال الأعمال يتغنوا أكتر؟ نبنى مصر عشان اللى قاعد فالسلطة يقول انا أنجزت و انا هببت على حساب اللى إشتغل؟ والله انا نفسى مصر تبقى دولة عالم أول بس أيهما أولاً, الشعارات أم العمل؟ بمعنى أصح, ما علاقة العمل 8 ساعات أو أكثر كل يوم بتحقيق الحرية و الديمقراطية و العدالة الإجتماعية و الكرامة؟ اللى شايفه إننا بقالنا سنين بنشتغل و الوضع يزداد من السىء للأسوء ولا فى شعارات ولا فى تحسن لوضع المعيشة سواء من الناحية الإقتصادية أو الإجتماعية .. يا بتوع “نبنى مصر” .. فككوا من دين أمى عشان خلاص مابقتش قادر!
